A Orquestra Galicia Fiddle é un proxecto educativo
con repercusión internacional

A nosa orquestra está formada pola nosa sección xuvenil, de entre 14 e 30 anos, e o profesorado da asociación, con músicos de recoñecido prestixio dentro do panorama musical tradicional galego: Begoña Riobó, Anxo Pintos, Xosé Liz, Grupo Dagda, Teresa Santamarina, Felipe Rodicio e Alfonso Franco. En conxunto formamos un total de 35 músicos, na súa maioría violinistas, pero tamén violonchelos, guitarra acústica, percusionistas de música tradicional e voces como a de Claudia Franco.

Con influencias da música celta, o noso repertorio enriquécese cada verán na illa de San Simón, onde tivemos a oportunidade de intercambiar experiencias e melodías con músicos de Asia, México e países árabes como Siria, Marrocos ou Palestina. Co noso traballo queremos potenciar a música como unha ferramenta fantástica para a convivencia, a paz, a educación en valores, e para espertar a curiosidade, o respecto e o interese pola diversidade e a cultura de todos os pobos.