Codia concede unha bolsa para participar no Encordass Fiddle Fest
A música tradicional e a aprendizaxe compartida volven ser o punto de encontro entre dúas entidades comprometidas coa música tradicional galega: a Asociación Galicia Fiddle, que promove o uso alternativo dos instrumentos de corda, e CODIA, colectivo diatónico galego.
Grazas á colaboración entre ambas as asociacións, este ano CODIA concedeu a segunda bolsa consecutiva destinada a facilitar a participación do alumnado membro de CODIA nas aulas do Encordass Fiddle Fest, un encontro musical que reúne cada verán a músicos amateur, estudantes, profesorado e profesionais arredor das músicas de raíz e da formación instrumental.
Esta bolsa contribúe a promover a igualdade de oportunidades eliminando as barreiras económicas, proporcionando á persoa beneficiaria a posibilidade de vivir unha experiencia enriquecedora, participando en clases, obradoiros e actividades colectivas nun espazo creativo no que se fomenta tanto o crecemento artístico como a convivencia entre a música galega e doutras culturas.
Esta colaboración, iniciada en 2025, consolida os vínculos entre ambos colectivos, que comparten a vontade de conservar, actualizar e transmitir o patrimonio musical galego ás novas xeracións.
Pola súa parte, CODIA consolídase como unha referencia para a comunidade do acordeón diatónico, impulsando encontros, recursos e iniciativas arredor dun instrumento fundamental na nosa tradición musical.
Galicia Fiddle, a través das aulas en Encordass Fiddle Fest, nas que sempre houbo lugar para o acordeón diatónico, este ano coa edición Especial Escocia abre a posibilidade a outros instrumentos, como a frauta ou whistle, piano, instrumentos de gran importancia na música escocesa.
